ما هو المفهوم الحقيقى لاستقلالية البنت ؟

أن اتفقنا اواختلفنا فهي ظاهرة منتشرة بشكل كبير لكن خارج مصر، استقلالية البنت .. تعددت مفاهيم استقلال البنت بين الناس، فمنهم من رأى أن الاستقلالية تعريف لكلمة حُرية وتتمثل تلك الحرية فى أن تعيش البنت بمفردها، ومنهم من يراها الهجرة والسفر بالخارج وأخرون يروها هي المسئولية التي تتحملها البنت، لكن استقلالية البنت في مصر تبعاً للعادات والتقاليد شيئاً مرفوض سواء كانت هجرة أو ان تترك البنت منزلها، وهو مادفعنا لسؤال شباب وبنات عن تقبلهم لفكرة استقلال البنت ؟ وهل يقبل الشاب ان يتزوج من بنت مستقلة ؟ وهل البنت تريد ان تستقل ؟
البداية من أمنية قالت : أي شخص سواء ولد او بنت لازم يستقل بنفسه لما يكون عنده وظيفة ويقدر يستقل مادياً، لان أول خطوه فى الاستقلال هي الاستقلال المادي، ولما يحقق ده يقدر يتعلم تحمل المسئولية عشان يوصل لمرحلة أنه يتحمل مسئولية غيره، بس مجتمعنا معندوش التفتح انه يتقبل فكرة زي دي، وانا لو جاتلي الفرصة اني استقل هعمل كده بس هستني الاستقلال المادي .
نورهان : هو مش شرط ان الاستقلال يقتصر مفهومه على أنها تعيش فى بيت لوحدها أو تسافر أو تشتغل، الفكرة بتبدأ فى اختيارها لكلية اللى عاوزه تدخلها، تلبس الحجاب ولالا وتقدر تاخد قرارتها بنفسها بحيث يسمحولها اهلها أنها تغلط وتتعلم من غلطها، فى الاخر احنا مجتمع شرقي له عادات وتقاليد وانا زي اي حد بتفق وبختلف معاه فى حاجات، وبالمناسبة انا دلوقتي مسافرة برة مصربعمل ماجسيتر بس محترمة عاداتي وتقاليدي .
أحمد: انا ضد الفكرة لأن عاداتنا و تقاليدنا شرقية و في طريقها للهلاك قريب، هتوصل البنت  لمرحلة تقوم فيها بأعمال الرجل من العمل في محطات الوقود و الى المطاعم والكافيهات و غيرها، الجيل ده هيوصل المرأه الى الهلاك ويجعلها رجل، وانا شايف ان المرأه ملزمة بالرقابة على طول لسهولة التلاعب بمشاعرها، ومش بشوف ان دي نظرة تخلفية ولكنها نظرة مستقبلية
داليا :  انا مش مع الموضوع ده لاننا شرقيين مختلفين عن بره، لو جيتي اخدتي خطوة زي دي بره هتكون حاجه طبيعية لانهم بيستقلو من سن 16 سنة بس نفس السن دا هنا فى مصر بنبدأ نخاف عليهم، انا هضمن منين مين ممكن يهجم عليها ولا مين بيجيلها البيت ولا هي بتتعامل مع ناس كويسة ولالا، وفكرة المسئولية ممكن تتحملها وسط اهلها، انا واحدة اتحملت مسئولية نفسى وانا وسط اهلي .
روبا : استقلالية البنت حاجة كويسة بس لو اهلها موافقين عليها ، انا مقدرش اعيش لوحدي بعيد عن اهلي بس حاجة زي دي بتعلم المسئولية.
ايمان : انا ارجح الفكرة جدا وأن البنت متكونش معتمدة على حد تاني، لان المجتمع بيربط الشخص دايما بالجواز وخاصة البنت انها تعمل اللى هي عايزاه بس لما تتجوز، بس الموضوع ده صعب شوية فى مصر لان الاهل هيرفضو الفكرة عشان الامان، وانا شايفة أن الموضع ملوش اي علاقة بالامان لان اللي بيحصل للبنت بقي يحصل للولد .


Ghada bahaa eldin
49383